|
آلقشلاييب حقيقتي
حقيقتدن ياز ائي شاعير
سارسيلما هر اسن يئله
هر چتينه دؤز ائي شاعير
***
آلقيش عشقه، محبّته
آلقيش آچيق اؤزگورلويه
چاليشيريق بو گون بئله
بيزيم‌كي‌دير صباح دئيه
يارانميشيق اود آلوودان
بيز دُشمن ا‌يك كؤله‌لي‌يه
مين آتيني بير داها دا
بو ائللري گز ائي شاعير
***
دَييشيلير گوندن گونه
دَييشيلير خريطه‌ميز
چيركين اللر گؤر نئيله‌يير
يوخوداييق هله ده بيز
قاراباغين چؤللرينده
سولدو لاله، سولدو نرگز
بيزه اولان ظلمو گؤرمور
يوموب دنيا گؤز ائي شاعير
***
اؤزگه‌لرله دوغمالاشيب
اؤزوموزه ياد اولموشوق
اؤز آغزيميز آغي دادير
اؤزگه‌لره داد اولموشوق
بؤلونموشوك نئچه يئره
قول اولموشوق بود اولموشوق
آياقلاردا دؤنمه كوله
قويما سؤنسون كؤز ائي شاعير
***
بو عصريده هر نه اويون،
اويونجاقدير بيزه دوشوب
گؤزو يوموب يؤگوروروك
هر چكيلن ايزه دوشوب
اويناييريق هر چالقي‌يا
عارسيز- عارسيز اوزه دوشوب
بيلميرم بو نه غمزه‌دي،
بو نه عيشوه ناز ائي شاعير!؟
***
تاريخيميز قان قادالي
اينانميرسان واراقلا بير
دونن چوخ دا قوچاق‌ايديق
هله كي دوشموشوك اسير
دُشمن بيزي توتوب ساغير
قانيميزي سوت تك امير
اوتانيرام چوخون دئيه‌م
ترسه دوشوب سؤز ائي شاعير
***
بير گون شانلي دَده قورقود
اؤز سازيني كؤكلر گلر
كوراوغلونون دلي‌لري
چالار بؤيوك ظفر گلر
گئجه قالماز، آرخاسينجا
آل گؤنشلي سحر گلر
هر زمانين اؤز حكمو وار
گلر بهار ياز ائي شاعير ...
|
